Gait van de Renderklippen: Geklongel

Met Trump an ’t roer is ’t zo gek niet dat mensen niks van de politiek mutten hebben. Mar kan de politiek in onze eigen umgeving zich daor achter verschulen? Ik zied joe in gedachten al schuddekoppen en ik wete ok in welke richting. 

’t  Hef een veel bredere oorzaak. Zowel nationaal, regionaal as lokaal ku-j elke dag in de krante veurbeelden vienden van politici die uut de boch vlieg en ’t kiesvolk vadder van Brussel, Den Haag, Arnhem en Oldebroek, Elburg  en Nunspeet af drief. 

Niet meer luustern nao mekare, alles bèter weten en discussies waor gien hond brood van lus in ondermaotse woorden.

Mekare de grind intrampen, gevuulloos, ikke en de rest kan stikke.

De kiezers die de democratie nog wel hoog heb zitten raak ok an ’t twiefelen wanneer de petieje waorop ze heb estemp, die de meeste stemmen kreeg, niet meer an ’t bestuur deel mag nemmen. Umdat d’r iets uut ‘t verleejen of erèkend mut worden en een gezich wat niet an stiet. 

Koehandel waor ’t gemene volk gien begrip veur hef, umdat ze ok niet in de hoek van ’t achterkamertien heb mee kunnen luusteren.

Akelijk zunde dat dan daordeur een deel van de stemmers een verkeerde ofslag nemp en de politici in de meest denkbare woorden of nog slimmer tegemoet treedt. 

Welk verstandig mens wil daor dan nog jaoren van zien tied veur opofferen?

Ik bin sportstief mar wat dit an geet zit in een spagaat.

In Oldebroek hef Tom vier jaor lang beroepen dat ’t allemaol niet klop in ’t gemeentetehuis en daor ‘t heilige tal van zeuven zetels an aover ehollen. 

Mar hee mark noe ok hoe muuiluk ’t is umme ‘t met de andere petiejen eens te worden. In Nunspeet is de grootste petieje stof geraak pluus.

Luu die aover Bee & Wee ach en wee roep zollen achterumme kunnen kieken en ontdekken dat ze zelf gien haor bèter waren.

Een oproep dus an alle politici umme in de spiegel te kieken en te ontdekken dat ze ekeuzen bint umme de gemeenschap te dienen en niet umme mekare de vliegen of te vangen.

Daor waor Tom dat nog niet veur mekare krig dan mar de Tom Tom raodplegen. Die wis zuver de weg. Mar niet in ‘t politieke verkeer. 

Groetenisse van GAIT.