Gait van de Renderklippen: Keze

Alles mut vandage de dag in ’t Engels. A-j daor niet mee umme kunt gaon dan bi-j een hopeloos gevallegien. ’t Is niet zo muujlijk umme uut te fiezelieren hoe ik daor aover denke.

Mar noe mu-j toch is heuren. ’t Kan ok kats anders uutpakken is mien van de wèke ebleken. Merie en ik bint d’r nog niet aover uut elachen.

Met dit heite weer is ’t wies a-j genog water nao binnen sloek. Wie waren een entien an ’t fietsen en bint al rap ââns een horeca tente binnen estap umme een glaassien fris te bestellen.

Wie raken nog an de klets met een varre nève van Merie en ik mudde toegeven dat d’r van fietsen daornao niet veule terechte is ekomen.

Deur dat geklets, zu-j denken, mar dat was ’t niet. Wie kwamen helemaole niet meer bie van wat zich in ‘t kaffee ofspeulen. En dat hef dan weer alles met Engels te maken.

Op een bret an de muur stun onder mekare worst kaas met nog wat tekeningen en zo d’r umme hen. 

Kwammen d’r twee luu binnen die plaats nammen an een taofeltien dat nog vrie was. Hee vègen zich ’t zweit van de kop, liet zien ogen aover de anbiedings gaon en toen vielen zien ogen op worst kaas.

Ie kunt oe niet veurstellen hoe rap hee de vrouwe bie de âârms nam, een stel lelijke woorden in ’t Engels d’s ut smeet en schuddekoppend niets nao buten stiefelen.

Ie kunt joe veurstellen dat die ankondiging op de mure ‘m worst zol wèzen mar dat stik toch effies anders in mekare. Worst is in ’t Engels ’t slechtste van iets. En ie kunt oe de rest wel veurstellen. Een kaffee dat met koeienletters  reclame maak veur de slechtste keze.

As ze noe gewoon in onze streektaal, zo as wie dat nuump, wors hadden eschreven, dan hadden die beide Britten niet met een lege mage deur ’t darp hoeven te fladderen. Ik wol d’r nog achter an umme uutleg te geven, mar daor hiel Merie mien bie tegen. 

“Laot die Britten mar is vulen Gait wat wie allemaole aover ons hen krieg. Shoppen in plaatse van winkelen, naogenog niks meer in ’t Algemeen Beroerde Nederlands, laot staon in ’t dialect.”

Mar goed, ‘t kan dus ok veur de Britten knetter verkeerd oflopen as ze zich allenig an eur eigen taaltien vaste holt. Merie en ik heb ’t d’r nog elke dag aover. 

Ontvank de groetenisse van GAIT.