Gait van de Renderklippen: Pienanties

Merie is de enigsten op de Renderklippen die d’r gien muuite mee hef dat ’t Oranje op ’t WK in Mexco is verbleek. Ze kon gien oge meer dichte kriegen as ik in ‘t holst van de nacht uut bedde stappen, veurzichtig deur de slaopkamer schufelen en dan een stoel umme schuppen waorbie ik ok ’t zwiegen niet kon doen.

Niet dat ze veur Marokko was. Ze hef zelfs een oranje bloessien edragen. Ze wil ok gien kwaod woord heuren aover de trainer: nee, Koeman is in eur ogen gien boeman mar gewoon Koeman die met een zieke vrouwe thuus niet lekker in zien vel zat en misschiens bèter niet nao ’t land van Trump had kunnen ofreizen. Mar ja, een man een man, een woord een woord. Ie laot de troepen niet in de steek as ’t lèven oe effies niet toelach.

’t Ging uuteindelijk helemaole mis met de pienanties. “’t Is toch de bedoeling da-j ’t daormee vadder schup en niet da-j oe zelf uut de WK tramp?” gif zee an en daor is vanzelf gien spelde tussen te kriegen.

Al jaoren lang geet ’t vanof elf meter kats verkeerd. Ze heb d’r alle verklaoringen van de wereld veur klaor liggen, mar ’t is gewoon niet anders dan dat wie in Nederland op ’t hoogste niveau niet umme kunt gaon met de spanning. Let mar op: as ze vanaf de middenstip nao de balle loop dan heb ze de broek al vol.. Daor mut de KNVB een zieleknieper veur inhuren umme an dat geschutter een ende te maken.

Ik denke d’r anders aover. Gewoon een veurstel bie de grote baas Gianni Infantino indienen umme de speulders van DSV’61 met Oranje mee te sturen en achter de hand te hollen as ’t weer op pienanties an kump.

Die heb kottens alle vuuf strafschoppen d’r feiloos in ejens. De keeper uut Ommen hef de balle allene mar kunnen oprapen. Jeffrey Schreurs en zien maoten stunnen ok onder hoogspanning, Die lieten zich de kop niet gek maken. As een kieper de balle tegen hölt, ala, dat kan, mar een ende naos de kool schieten, dan bi-j niet de persoon umme an zon klus te beginnen.

Merie hef eur nachtrust terug. As d’r noe mar gien nieje hittegolf an kump denderen umme ons uut de dommel te hollen. 

Doet d’r kalm mee hen en ontvank de groetenisse van GAIT