Gait van de Renderklippen: Pleite

De wèèkmark is veur veule Veluwenaren een plekke waor ze mekare ontmoet, informeert nao de gezondheid en de niejste dorpsroddels besprèèk. Bie de olderen onder ons kump ’t dan vake neer op vergèètachtigheid, ze-k mar slietage an ’t benul.

Holt d’r mien aover op, want somtieds weet ik precies hoe ene die t’r sprake kump d’r uut zut, mar kan niet op de name kommen. Zo van: ik kan niet op oe kommen, mar dat mu-j dan op zien Nedersaksisch beoordelen en niet met ‘t Algemeen Beroerde Nederlands.

Veur ik te var van ’t onderwarp of drieve: terug nao de mark. In Nunspeet veural een lèvendig gebeuren waordeur veur een smak volk de donderdag gien gedonderdag is mar juus ene van de hoogtepunten van de wèke. 

Veural de vrouwluu zet de wekker d’r gelieke op. Tied veur de rebbel en gekwebbel zeg buurman Knelis, mar dat laote ik mooi veur zien rèkening. Ik laote mar in ’t midden of de euro met de gulden mee is egaon en die noe ok anderhalve euro weerd is, net als vrogger de gulden een daalder.

’t Argument van gezelligheid speult denk ik de eerste viool bie een gebeuren waor toch al veule muziek in zit.

Nee, niet met instrumenten in een kraome, want dat gif teveule heisa waordeur de dames mekare egees niet meer kunt verstaon.

Kort en goed: de mark hef zien weerde behollen, ok al is d’r in zovarre veule veranderd dat de jonge vrouwen anders dan in onze tied an ’t wark bint buten de deure en d’r niet meer zo makkelijk effies uut kunt lopen. Mar de ene plaatse is de ander niet. Niet zo’n ende weg steet de mark zwaor onder druk. Steeds minder kraomen, steeds minder volk en steeds minder reuring.  Daor laot de markgangers ’t niet bie zitten. Tied veur een ludieke aksie. Ze heb ’t Markplein op de schuppe eneumen en letters weg eschrap. Mark is blieven staon en daor hadden ze met een stift pleite achter ezet. Markpleite….

‘t Kump niet zo vake veur dat ik lachend aover de Renderklippen giespele, mar dit keer was ‘t ok gien slappe lach. Lao-w d’r veur waken daw alle tradietsies aover boord smiet. Wie mutten al genog inlèveren met dat modarne geknooi van AI. Ik bin gien robot. GAIT.