Gait van de Renderklippen: Moaten

Stukkien veur bettien timmert ze ok bie ons in de regio kammenetten in mekare. In Oldebroek zo-j kunnen zeggen dat olde liefde niet roest. Een college met SGP en SGP light meent pattie luu. CVO en SGP dus heb se de verkiezingen tien zetels aover ehollen en da-s lange niet wat zol dat.

Ze kunt ‘t maken en brèken, mar dat laatste bint ze zeker niet van plan. Achter de deure met ’t geheim aoverleg vandan is nao buten ekomen dat Tom de Nooijer en Erik Doornwaard op ’t pluche plaats nemp. Olde liefde?Ja, wach is effies, vier jaor geleden vochten die twee mekare zowat de tente uut. 

Mar an ’t ende van de rit kraopen ze weer nao mekarer toe en dat hef ze beide gien windeier eleg.

En slim as ze bint heb ze d’r noe de ABO bie ehaald. Ze weet dat die d’r ene van buten bie betrek. Dat hank nog in de mist. Mar as Tom en Erik ‘t op de heupen krieg kan die butenstaonder ze uut mekare hollen. 

Tom en Erik vergèèt onenigheid en bint noe maoten in ’t nieje college van Oldebroek

D’r bint ok luu in de politiek dat den van de ABO straks de klappen op kan vangen.

Börgemeester Tanja zal d’r flink an mutten wennen. Ze hef vier jaor lank heel wat duels met De Nooijer uut evöchten en mut noe elke dinsdag met mekare töt één beleid zien te komen. Ze mut ’t noe doen zonder Liesbeth Vos an de ene kante en Henk Kemp van de andere kante. 

Ze hef ons in de niejaorspraot wies emaak dat ze zó an Oldebroek is ehech dat d’r wel heel wat biezunders mos gebeuren wil ze hier opstappen. De vraoge is of disse toestand al niet biezunder genog is. 

Ik haope dat ze zich van alle kanten een bettien inschikkelijk toont. Oldebroek is nao een bonke trammelant toe an schipperen in rustig vaarwater.

Met twee vechtjassen as maoten in bee en wee hoef ’t volgens mien daor gien ach en wee te wèzen. ’t Meneertien van de krante zit d’r baovenop en hölt joe op de heugte. AZC en evenementen bint de bréékiezers waor ze ’t aover eens eworden bint ze-k ze. Mar veur hoe lange? Tom hef zien baantien veur onbekend Nederland op de dwangbuize op egeven en gooit al zien energie in de politiek van Oldebroek. Vervèlend zal ’t de komende tied zeker niet worden. De politiek kan wel wat meer belangstelling gebruken.

Ik wens joe met mekare een mooie wèke. GAIT.