Gait van de Renderklippen: Grééien

Henk is wa-j nuump lange niet gek. Allene hef hee d’r muuite mee umme ’t met Anke, zien bètere helfte za-k mar zeggen, in de rieje te hollen. Hee is altied doende umme ââns bèter van te worden. Mien opa numen dat grééien en ik hol mien daor mar an vaste. In ’t Algemeen Beroerde Nederlands nuump ze ’t inhalig, mar dat laote ik an de stadsen aover.

Kottens melden hee zich bie een vriewilligers pluugien umme appels te plukken. Veur een goed doel. Ik keke d’r van op,want dat goeje doel bie Henk geet deurgaons mar ene kante uut: die van zien eigen knippe.

De bomen stunnen an ’t water. Alle appels hingen an de goeje kante, dat wil zeggen: de plekke waor a-j ‘d’r makkelijk bie konnen. 

Ik mudde zeggen dat Henk zich niet onbetuug liet en al gauw een mande vol had.

Hee keek wel met een half oog nao de aoverkante waor een hele preuze grote goldrenetten hingen. Daor bleef iederene van of, want zo lenig was d’r gien ene van ’t gezelschap umme zich daor zonder gevaor an te waogen.

Ze heb een mooi bettien plukloon bie mekare ekregen en zetten zich met een blie gezichte an de koffie. 

Ene ontbrak. Ie raoit ’t al: dat was onze Henk. Toen iederene in de schure zat veur ’t bakkien troos ging de smiesterd terugge nao de boom in kwestie. 

Hee streupen de mouwe op, keek begerig nao de grote jonges an de andere kante van de sloot. Halen diepe aosem en lanceren zichzelf.

Net op dat moment kwam Dina-van-de-appelbome nao buten, zag ‘m meratten, en riep: Henk, koffie!

Hee vulen zich e trappeerd, raken uut balans en mietern met kop en kont in ’t water. 

Iederene kwam nao buten  en heb staon gröalen. Ze waren niet te beroerd umme Hendrikman weer nao de kant te  trekken.

Gerard bie Henk uut de buurte wis zich nog te herinneren dat Henk zien opa aoveral tegen opliep in zien pogingen umme wat griepstüvers op te rapen. En toen waren ze ‘t d’r allemaole al gauw aover eens dat de appelniet varre van de boom was evallen. En Henk dus in de sloot. 

Luu, hot mekare vaste in disse onzekere tied. Groetenisse van GAIT.