Gait van de Renderklippen: Deurtassen

A-j vandage de dag in de buurte van een legere schole mutten wèzen, holt d’r dan rèkening mee da-j een ende mutten sjouwen, want de straoten bint vergeven van ’t blik.

Vrogger fietsen de vente al gauw zonder moe, mar da-s met ’t gepamper in disse tied kats anders. Zelfs de leerlingen in de baovenbouw bren-k moe met eur autogien.
Ik wete ‘t: d’r is veul meer verkeer, mar dan nog is dat in de watten leggen niet zo wies op weg nao een groot mense. En as ze noe is die geluuddragers of zollen zetten was ’t fietsen nao schoele ok een stuk minder gevaorlijk.

Merie stik ’t vingertien op umme mien te waarschouwen tegen wat ze op zien zundags generaliseren nuump. Daor hef ze ’t grootste geliek van de vismark in. Ze grip dan terugge nao Henkie bie ons in de buurte.

Dat jonk hef bie een valpartieje een grote wond in de bene op elopen. Dat herstel kos vinnig veule tied. Hee lut ‘m d’r niet deur uut ’t veld slaon, zeg op grote ofstand te willen blieven van de klaagmure en dut d’r alles an umme zich ‘dr aover hen te zetten.

Een eerste operatie hef d’r slim veur ehollen. Een ontstèking brach ‘m nog wat vadder van huus en gunk gepaard met een hele hoop piene. 

D’r kwam een nieje gang nao ’t ziekenhuus an te passe.

Veurege wèke heb Merie en ik ‘m bezöch. Hee verontschuldigen zich dat hee de krante al een tietien niet meer had kunnen bezörgen. Mu-j naogaon. Noe nemp zien moe dat veur ‘m waar, mar dat wil hee eur zo gauw meugelijk weer uut hande nemmen.

Wule hadden ‘m een flinke tros druven of droeven, net naoda-j ze uutscheldt, mee eneumen, want daor is hee gek op.

Vanzelf wi-j weten hoe ’t um daor in ’t hospitaal was vergaon.

“Och ome Gait, nao de eerste operatie had ik ’t gevuul dat d’r een vrachwagen aover mien heer was ereejen. Dit keer was ’t misschien een lichte personenwagen. Waor hei-j ’t dan in feite aover?”

Vanaf zien ziekbed hef hee zich in espannen veur een Syries klasgenootje dat kans lup umme weer uut ewezen te worden. Alle leerlingen heb een brief nao Den Haag estuurd. Met zulke jonge mensen kunt wule de toekomst wel an. 

Luu, holt de bene d’r onder en wèès bettien vrindelijk veur mekare. Groetenisse van GAIT.