Gait van de Renderklippen: Ongeleuflijk

Wie ’t niejs volg hef de leste wèken hef de wenkbrauwen töt an de de haorgens op etrökken. Ze lazen dinge aover Oldebroek die-t ze met gien meugelijkheid konnen riemen met wat d’r töt noe toe is blieven hangen. Een gemeente die op de zwàtte lieste steet as ’t umme de opvang van de mens in nood geet. De asielzukers dus.

Dat wi-j toch egees niet geleuven a-j in oe achterheuf heb dat juus Oldebroek al jaoren veuruop löp in naoberhulp töt varre aover de grenze.

De gemeenschap hef zich ontfarmp aover heel veule meer Okeraïners as welke gemeente dan ok. En dan noe in ene keer zelfs niet meer an de plich voldoen? 

Hoe dan ok: nao de verkiezings staot de luu tegen makere op, bint d’r demonstraties waor de landelijke media op of komp. Ongeleuflijk zo-j zeggen, mar dat woord ku-j toch niet in de mond nemmen as ’t umme een gemeente geet waor juus ’t geleuf hoge in ’t vaandel steet.

“Mar niet in ’t vaan van dit kolleezje”, zeg Merie, met een verwiezing nao de Règenboogvlagge die in disse körkdreuge tied niet meer worden ehesen. En dan vuul ik ondanks de dreugte nattigheid. 

Ie kunt wel ofgeven op ’t nieje college rondumme Tom, mar da-s niet eerlijk. Hee hef veur de verkiezingen laoten weten waor as hee veur steet en daor heb onmundig veule luu ja bie eknik. 

Ie vraog oe noe in goede gemoede of wat of ‘t echte Oldebroek is. Dat van ’t menslievende volk of dat van de luu die de mens in nood in de kou wil laoten staon.

As ’t an Tom lig dan mut Oldebroek zelf uut maken wat ze wil en hef hee ’t antwoord al in de binnenzak.

Zeker, ‘t centrum veur opvang van asielzuukers heb ‘t hastik verslof as ‘t op Oldebroek an kump. D’r lig noe een Oldebroek op straote waor de butenlandsemedemens, en al helemaole de niet geleuvige medemens, niks te zuken hef. Dat wil d’r bie Merie en bie mien niet in. De stemming hef ezörg veur ontstemming. Laot de Oldebroekers toch in vrede met mekare blieven optrekken en zich niet de oren an laoten nèèjen van luu die mekare niet kunt luchen en niet kunt zien. A-j Oldebroek ietsies verkeerd an slaot op ‘t tiepörgel krieg ie onderbroek te zien. En die zak mien of bie waww noe te zien krieg.

Groetenisse van GAIT