Gait van de Renderklippen: Veraltereerd

Wat mien noe van de wèke is aoverkomen, dat hol ie niet veur meugelijk. Ik worden ebeld deur Jan van umme de hoek die mien vertellen dat zien schone zuster Drika alderkeizerse mooie verhalen kon vertellen waor ik mien huukien mee kan vullen.

Ze woont in de Randstad, dat is met wa-j vandaag de dag veur brandstof mutten dokken, niet hendig, mar Jan maken ‘t zo spannend dat ik ’t d’r graag veur aover hadde.

Gait dus op weg nao Mokum, want dat adres gaf hee mien mee. Een straote met ’t nummer 43 in Niej Zuid. Mar op schoele was aardrijkskunde niet mien favoriete vak. Ik raken dus in de wilde boekweit, wol ok niet op een betaalde parkeerplaatse staon, want daor bi-j in de hoofdstad een bonke geld an kwiet. Ie maak ’t d’r oezelf niet gemakkelijk mee.

Dewiel dat ik met een knalrooje kop an ’t zuken was, vulen ik in ene keer een hand op de scholders. Zoiets in Amsterdam, daor krig een mense de schrik van. Ik drééjen mien umme en heb een tel of wat met de mond helemaole lös estaon. De hand was van Berend, mien olde schoolkameraod, waor ik heel wat gekkigheid mee uut heb ehaald, zo as de start van Marieke veur ons in de inkpot stoppen.

Ik kon niet te lange an de klets blieven, had nog wel steugien aover mar ik dienen toch eers te weten waor ik mos wèzen. Ik vreug um nao nummer 43 van de straote in kwestie. Hee begun te lachen en daor kwam gien ende an. Kort en goed: Berend vertellen dat hee op 41 woont en in Drika een alderkeizers goeje buurvrouwe hef. Ik mosse toch nog effies eerst bie ‘m nao binnen, want hee vertellen mien dat hee etrouwd was eraak met Janna, een klasgenote, eentje waor ik ok op schole ’t oge op had, mar dat was veurdat ik Merie diepe in de ogen keke. 

Ie kunt oe veurstellen dat ik daor zo niet vot raken. Berende wis wel een oplössing en halen Drika d’r mar bie. Lieve mensen wat was dat een ommenullig mooie naomiddag. Wie bint diepe in onze gemeenschappelijke geschiedenis edeuken en raken niet uut epraot, Temee kump ‘t hele spul op de Renderklippen an. Ik verheug mien d’r noe al op wat dat teweeg brenk. Ontvank de groetenisse van GAIT.

Ik drééjen mien umme en heb een tel of wat met de mond lös estaon