Gait van de Renderklippe: Vlagge

“Ik kan ok hemao niks an oe aover laoten”, zei Merie en schudden demonstratief met ’t heuf. In dit geval had ik d’r niet van terugge. Umdat zee de dikkedeur van de krante belt as ik niet de galg veur mienzelf klaor zette krieg ule ’t onder de ogen.

’t Was kottens weer zo wiet met Koningsdag, 4 en 5 mei. Merie hank dan meestieds de vlagge uut, al nao gelang helemaole of halfstok.

Met de verjaorsdag van Willem Alexander had zee ’t de druk met kaoken en kreeg ik ’t commando umme de klus te klaoren.

’t Geheister met de trappe is niet waor ik in uutblinke, mar ik laote mien vanzelf niet kennen en bin d’r mee gangs egaon. Merie was wel zo wies umme onder an de trappe toezich te hollen. Dat stellen ok weer niet zo heel veule veur, want ze stun d’r bie te kwekken met Mina an de andere kante van de hegge.

Merie was wel zo wies umme onder an de trappe toezich te hollen

In de koffietied kwam de posbode an de deure. Dat is nooit ’t geval, want wat hee veur ons hef dut hee braaf in de brievenbusse.

“Gait, ik kan wel zien dat ie elk jaor in Frankriek vakansie holt”, zei hee en maken mien daormee niejsgierig.

“Komp mar is mee nao buten””, kreeg ik te heuren en hee trök mien an de mouwe.

En och mien lieve stumper. Ik hoeven gien twee keer te kieken wat of hee bedoelen. De blauwe kleur eerst en dan pas ’t wit en rood. Hastik op de kop. En ok nog half vaste zodat met bettien wiend ’t dundoek van de stok zol vallen. En dat met ’t koningshuus!

En of ’t zo wèzen mos kwam Merie ok nog achter ’t fenuus vandan umme zich d’r mee te bemuuien. 

Tegen de brievenkeerl: “Ie ziet wel wat d’r bie um scheef zit hè? Hee is hastik kleurenblind.”

Mar dat liet ik ok weer niet op mien zitten. “As ie niet met de buurvrouwe an ’t kwekken ware ewes had ie ’t ok kunnen zien”, heb ik tegen ewörpen.

Ze gaf mien groot geliek. “’t Klop helemaole Gait. Ik mudde alles wat uut oew hande kump controleren en ’t liefste nog twee keer ok.”

De posbode gröalen en maken zich uut de voete. Elkene op de Renderklippen weet d’r noe van.

Hee zit niet gauw umme een praotien verlègen en anders help ik ‘m wel.

Ja, dat bint momente waorop Gaitman de vlagge hef mutten strieken. Mar dat aoverkump mien niet striek en zet. 

Groetenisse van GAIT.