Gait van de Renderklippen: Pantoffelheld

11 maart 2026 om 15:10 Column

Eddy, onze petrettieskeerl met een vliegende lens, kwam kottens te late bie de voetbal. Toen hee ’t sportpark op kwam jachten schaoten ze d’r net ene binnen en die hef hee half strukelend nog proberen op te vangen.

Tegen ’t Meneertien van de Krante, die zich al zörgen maken, zei hee iets aover häärfstied of zo en maken zich d’r mooi van of. Wieter veur de res niks an de hand en joe heb een knappe foto bie ‘t verslag kunnen laezen. He hef alle kools evangen en ’t mooiste plaatien is in de krante ekomen. Fotograaf en verslaggever hastik blie dat de raegen en de kelte deur de zunne ’t zwiegen op is eleg, want an de draod met slim weer is niet wat een mense veur op de wensenlieste heb staon.

Half strukelend op ’t sportpark hef onze petrettieskeerl nog een kool kunnen vangen

Daor hadden ze ’t nog aover in de bestuurskamer, mar onze fotograaf zat met de kop nao beneejen en bemuujen zich d’r niet mee. ‘t Zol daor bie ebleven waezen as niet ene van de mensen ’t woord töt onze flitsende medewâârker had ericht. “Ik was vanmiddag wat vrog, mar ie waren mien nog veur. Ik zag oe al een uur teveurten stiefelen. Mar in ene keer waar ie vot. Worden ie niet goed of zo?”

Dit keer mos onze man met de billen bloot. Schoorvoetend vertellen hee hoe de vörke an de stel stak. Hee had nog wat wark edaon in de donkere kamer, ’t ging vlotter as gewoon en gauw weer van ’t donker in ’t lich in. Mar ene keer op ’t sportpark worden ’t weer kats duuster. Hee stappen de auto uut in de modder en….met deurweekte pantoffels…..

D’r zat niks anders op dan weer op ’t Harde an te gaon, want zien vrouwe was op bosschappen jach en trouwens as zee wel thuus was ewes had dat ok niet zo veule uut emak. In de benzinekosten bedoel ik en die lieg d’r in disse tied ok niet umme.

Ze heb d’r die naomiddag heel wat of elachen daor in Epe met Eddy die in de gauwigheid thuus ok nog de zundagse schoene an had etrökken en daor zal hee nao afloop thuus misschiens op of eraekend waen. En daorbie kwam ok nog dat de club uut zien darp een pak smeer had ekregen. Affein, de krokussen vlieg de grond weer uut en ’t veurjaor meldt zich an. Ok veur onze pantoffelheld.

Ontvank de groetenisse van GAIT.