Gait van de Renderklippen: Ophokken

4 februari 2026 om 10:40 Column

A-j in Oldebroek van plan bint umme in de zaal te sporten dan hoef ie gien haost te maken met ’t opwarmen. Een probleem met sporten waor niet mee völt te spotten. Kats gien ruumte meer veur luu die nog wat van plan bint en de verenigings die d’r noe al mee te maken heb en een verzuukien doet, krieg steeds vaker te heuren: volle bak.

Veur sportstieve mansluu, vrouwen bewéég genog in ’t huushollen, is daqt een slechte bosschap. Dat vindt ’t bestuur van De Talter ok en dat hef de gemeenteraod d’r op an espreuken. 

Dat zal ongetwiefeld niks van doen hebben met een advies ’t spul op mekaar te stapelen. Hoewel bie neuzings de hulp wel heel dichte in de buurt is met de huusartsenpost tegenaover De Talter an de Stouwdamsweg. Nie is stouwen een ander woord veur proppen, mar dat ma-j as niet meer dan een toevalligheid beschouwen.

Aover de huusartsen gien kwaod woord. Die heb zichzelf ered, daor waor de gemeente op zien minst niet scheutig was met medewarking. Mar goed, vanaf dat moment was ’t wel dokteren met de ruumte. Deur meer uren veur de gymmelestiek die d’r al gauw bie komp kump ’t daor ok al neer op meer vogelnessies maken. 

Pättie luu, ok in de raod, bint d’r klaor mee, mar ’t college wil zo kort veur de verkiezings niet aover ’t graf hen regeren en ’t an de nieje ploeg aover laoten of ze in dit verband de knippe wilt trekken. 

Want hoe of ie d’r ok tegenanb kiek: d’r is een bonke geld mee gemuuid umm zoveule ruumte te scheppen dat alleman inpandig in beweging kan komen. Niks tegen butensport, mar daor speult ‘t weer een rol. Nee, Merie, ik leze van oe lippen dat ’t college d’r ok mooi weer mee speult, mar dat hef een wensenlieste van hier töt Japan. Dan toch: an de ene kante niet de nieje ploeg veur de voeten lopen en ande andere kante zich d’r achter verschulen. Misschien dat de OZB wat kan betekenen, mar veur dat ule mien neer sabelt: dat mut dan wel verköch worden onder Onvoldoende Zaalruumte Biedragen, lös van Onroerend Zaak Belasting.

Merie gif ‘t weinig kans van slagen en hef weinig op met de lenigheid van de knippe.

Veur noe de groetenisse van GAIT.