Gait van de Renderklippen: Almachtig

25 december 2025 om 11:11 Column

Het zal oe toch gebeuren. Wie lééf in een vremde tied mar as de tied zelf an ’t knooien giet dan raak een mense van ’t peseel. Merie en ondergetekende bint d’r kats beduus van.

Wie volg ’t gemattel in disse wereld van dag töt dag. Met Niejsuur zol ’t mien krullen. Ik keke op mien polswekkertien en zag dat ik nog tied genog had umme effies buten een luchien te scheppen. Mar ik hadde de achterdeur nog niet dichte edaon of Merie riep mien weer binnen. “Komp gauw kieken Gait, ze heb weer niejs aover Oekraïne. Ik vlechten nao de huuskamer en krege nog net een stuksien mee van ’t gebral van Trump en Poetin, de beijen die ’t helemaole eens bint en zo gauw meugelijk Europa wilt verdelen. ’t Harloge was mien bie ’t niejs stil blieven staon. 

Gelukkig dat Merie die zender d’r toch al op had staon. Nao dit vervélende berich kwam de politiek an de beurte en dat was weer een niejerwetse versie van verstoppertien. Partiejen die zich verschuult, niks met mekare te maken wilt hebben, terwiel dat de hele wereld um ons heer in de fik steet. De tied van pien en poet(in) met een helen hoop geTrumpetter an de andere kante van de grote sloot.

Niejsuur was of, tied umme ’t bedde op te zuken. In ene keer sprunk Merie uut de stoel en zei: “Gait, mu-j noe toch is kieken. Mien polspendule steet ok stille.”

En ie wilt ’t niet geleuven: op ’t zelfde ogenblik dat bie mien de tied op de rem had etrap!

Daor denk een mense toch effies bie nao. Gien drone in de hof, niks van dat alles.

Zol ’t dan al zo veere wézen dat de grootvizier uut Moskou en de Amerikaan met de scheve bakkes d’r ok al in bint eslaag umme hier en daor de tied nao de hand te zetten? Dat wol d’r bie mien toch niet in. Merie was d’r niet zo zeker van. “’t Bint mansluu die aoveral verklikkers heb zitten. Misschiens dat ze oe stuksies volg en bint wule noe an de beurte.” 

Ik mosse effies naodenken aover macht en an de grenzen daoran. En toen vunnen de vrouwe en ik mekare in de aovertuging dat d’r mar ene Almachtig is en dat is de Grote Baas van hier baoven. En wat die beije rakkers ok denk veur mekare te kriegen: ze zult mutten bugen. Heel diepe.

Mooie feesdagen en groetenisse van GAIT.