Afbeelding

Gait van de Renderklippen: Rebels

Overig

Veule dinge die veur corona zo gewoon waren valt ons noe zwaor. De sjeuigheid is d’r uut: klagenben steunen heb de pit uut de mouwe verjaag. Dinge woir wie niet aover naodachten mar gewoon deuden, daor trek wie noe de neuze veur op. Dat geet in sommige opzichten heel varre. Nemp de voetbalders die al muu wordt as ze een balle ziet rollen. Twee wedstrieden in ene wèke? Ze zuuk ‘t bedde op bie de gedachten alleent al.De Jan Saliegeest is op ‘t veld neer edaald.In zien algemeenheid: tegen van alles en nog wat opzien. De dokters klaag ok steen en been. Ze gruuwt bie ‘t beeld van eur veurgangers die vierentwintig-zeuven klaor stunnen. Mar dat was een tied waorin mensen zich dan pas melden as d’r echt wat an de knikker was. Vake liepen ze d’r te lange mee deur. De dokters toen wissen dat as de mensen van zich lieten heuren ‘t ok menens was. Noe liek ‘t d’r op dat ze al an de tillefoon hank as ze een wind veur ’t gat dwars zit. En ik hebbe d’r begrip veur dat een dokter daor kribbig van wordt. Dat de pillendrééjer ok rech hef op zien vrieie tied en gien machine is die-j nao believen an en uut kunt zetten. Mar dat noe ok de aassistentes al deurdrééjt en in de wilde boekweit raak, dat is wel opmarkelijk. Laot ’t woord assistente niet vallen of Merie schut aoverende. 

Annegien raken an ’t hoesten en proesten, kreeg koorts en dat wees op corona. Toch mar effies bellen. Ze was an ’t dweilejn dus heb ik ’t mar veur mien rèkening eneumen. Ik heuren vuuf minuten lang dat de assiste in gesprek was en ik zo spoedig meugelijk zol worden ehölpen. As vief minuten spoedig is dan gif dat toch te denken in de gezondheidszörg. Merie wun zich op, nam ’t van mien aover. Nae nog een keer tien minuten een reactie. Ja, niet wa-j zollen verwachten: de tillefoon worden d’r op egooid. Vanniejs bellen en toen d’r nao weer tien minuten niks gebeuren deej ze de schòlk of, greep de fietse en joeg op ’t darp an.In ’t glas veur de assistente bzag ze twee deerns staon te giebelen. Ze was nog niet haklverwège met eur verhaal of ene van die meissies zei: ‘Mevrouw, u had eerst moeten bellen!’ ’t Is een wonder dat de boel daor veur ’t loket niet ontplof is. Dat hef allenig zin as d’r hier ene zit die de tillefoon opnemp, kon ze zich nog inhollen. D’r kwam gien antwoord mar de maniere waorop die beiden mekare ankeken zei al genog. Dat nuump ze misbruuk maken van de siuatie, die op zich slim genog is. Annegien is an de bèterend hand, hef ’t slim te pakken ehad. Ik wete noe weurumme de zitruumnte bie de dokter wachkamer heet.

Groetenisse van GAIT

advertentie
advertentie
>
Afbeelding
Een eeuw Hervormd Elim in ‘t Harde: ‘Altijd al een hechte dorpsgemeenschap’ 8 minuten geleden
Afbeelding
Woningbouw in Elburg: gemeenteraad geeft college steuntje in de rug 16 uur geleden
Afbeelding
‘Kleuren van de ziel- verrast door de Joodse mystiek’ 19 uur geleden
Afbeelding
Zilveren Schoenen: ‘t Harde schiet uit z’n slof 20 uur geleden
Afbeelding
Huisarts aan het woord: Stoppen met roken 22 uur geleden
Afbeelding
‘Kunst is mijn wereld’ 22 uur geleden
Afbeelding
Run for the Message gaat voor 9e editie 22 uur geleden